Կաթնատամների կառուցվածքը և առանձնահատկությունները

Կաթնատամները երեխայի կյանքի առաջին ատամներն են և շատ ավելի կարևոր դեր ունեն, քան հաճախ մտածում են ծնողները։ Չնայած դրանք ժամանակավոր են և հետագայում փոխարինվելու են մշտական ատամներով բայց կաթնատամների առողջությունը մեծ ազդեցություն ունի երեխայի ընդհանուր բերանի խոռոչի և դիմածնոտային շրջանի զարգացման վրա։

Ի՞նչ են կաթնատամները

Կաթնատամները առաջին ատամներն են, որոնք սկսում են դուրս գալ երեխայի մոտ՝ սովորաբար 6 ամսականից սկսած։ Դրանք սովորաբար ամբողջությամբ ձևավորված են լինում մոտ 2,5–3 տարեկանում և սկսում են փոխարինվել մշտական ատամներով մոտ 6 տարեկանից։ Ընդհանուր առմամբ երեխան ունի 20 կաթնատամ՝ 10 վերին և 10 ստորին։

Կաթնատամների կառուցվածքը

Ինչպես բոլոր ատամները, կաթնատամներն էլ ունեն մի քանի հիմնական շերտեր, սակայն դրանց կառուցվածքն ունի որոշ առանձնահատկություններ։

Էմալ

Էմալը ատամի ամենավերին և պաշտպանիչ շերտն է։ Կաթնատամների դեպքում էմալի շերտը ավելի բարակ և փխրուն է, քան մշտական ատամներինը։ Սա նշանակում է, որ վնասակար գործոնները՝ քաղցրը, թթուները, վատ հիգիենան, կարող են ավելի արագ ազդել ատամի վրա։

Դենտին

Էմալի տակ գտնվում է դենտինային շերտը։ Կաթնատամների դենտինը նույնպես ավելի բարակ է և ավելի զգայուն, ինչի պատճառով կարիեսը կարող է արագ խորանալ և հասնել խորը շերտերին:

Պուլպա (նյարդ)

Պուլպան ատամի ներսում գտնվող փափուկ հյուսվածքն է, որտեղ գտնվում են նյարդերն ու արյունատար անոթները։ Կաթնատամներում պուլպան համեմատաբար մեծ ծավալ ունի, ինչի պատճառով բորբոքումը և ցավը կարող են առաջանալ ավելի արագ։

Ինչո՞վ են կաթնատամները տարբերվում մշտականներից

Կաթնատամներն ունեն մի քանի կարևոր տարբերություններ՝

• փոքր չափեր ունեն

• ավելի բաց գույն են ունենում

• ունեն բարակ էմալ և դենտին

• ավելի զգայուն են կարիեսի նկատմամբ

• խնդիրները զարգանում են ավելի արագ

Այս բոլոր առանձնահատկությունները նշանակում են, որ կաթնատամները պահանջում են ավելի ուշադիր խնամք։

Ինչ պետք է հիշեն ծնողները

Կաթնատամները ժամանակավոր են, բայց դրանց ճիշտ խնամքը՝ կարևոր։ Դրանց կառուցվածքը հասկանալը օգնում է ծնողներին ժամանակին նկատել խնդիրները և ճիշտ որոշումներ կայացնել։ Կաթնատամների կառուցվածքն ու առանձնահատկությունները բացատրում են, թե ինչպես կարող է երեխաների մոտ կարիեսը զարգանալ ավելի արագ և ինչու է կարևոր չհետաձգել այցը մանկական ստոմատոլոգի մոտ։